قال كلمته

بالمختصر..
قلمه انكسر..
بس قلبه ع اللي بيحاربه انتصر..

قال كلمته..
ريح ضميره وذمته..
وبكل عزمه وهمته..
كشف الحقيقة..
قامت حريقة..
وف لمح البصر..

ورقة وقلم..
كانوا همّ كل ثروته..
وبيها وصلت صرخته..
للي ظلم..
واللي اتظلم..
واللي اتنسى..
وسنين طويلة بينتظر..

طبع الأمل..
مع كل كلمة ف الخبر..
عنوانه خارج الحدود..
وعمود يدافع عن عمود..
إيه العمل..
لو حد جاهل بالعبَر؟

يا ما عَبَر..
على خط أحمر يمنعه..
يا ما صبر..
على نار قوية بتلسعه..
يا ما اتحذف..
يا ما اتشطب..
كل اللي قاله للاسف..
واللي اتكتب..

لكنه عمره ما اتجبر..
على سبق غير بيسمعه..
على كدب غيره بيصنعه..
مهما كسَب.. مهما خسَر..

صوته اتمنع..
بعد اما كان من أعلى سلطة بيتسمع..
دلوقتي باسم المجتمع..
نجمه انطفى..
وهناك ورا الشمس اتنفى..
وان كان ولابد..
حيقوله اختفى